امریکی ریاست ٹیکساس میں ایک خطرناک انسانی اسمگلنگ نیٹ ورک کے دو مرکزی کرداروں کو 2022 میں 53 تارکین وطن کی ہلاکتوں میں ملوث ہونے پر عدالت نے قید کی سزائیں سنا دیں۔ عالمی خبر رساں ادارے کے مطابق ٹیکساس کی مغربی ڈسٹرکٹ کورٹ نے ایک مجرم اردونا-ٹوریس کو عمر قید اور ڈھائی لاکھ ڈالرزجرمانے کی سزا سنائی۔ اسی طرح مرکزی ملزم ارودنا ٹوریس کے شریک مجرم 55 سالہ آرمینڈو گونزالیز-اورٹیگا کو بھی اسی کیس میں 83 سال قید کی سزا دی گئی۔ اس کیس میں اب تک دیگر 5 ملزمان بھی اقرار جرم کر چکے ہیں اور انہیں رواں سال کے آخر میں سزائیں سنائی جائیں گی۔ اسمگلنگ نیٹ ورک کا ایک اور مبینہ رکن، ریگوبیٹو رامون میرانڈا-اوروزکو، جسے گوئٹے مالا سے امریکا حوالگی کے بعد گرفتار کیا گیا ستمبر 2025 میں مقدمے کا سامنا کرے گا۔ 30 سالہ فلیپے اردونا-ٹوریس انسانی اسمگلنگ کا ایک نیٹ ورک چلا رہا تھا، جو گوئٹے مالا، ہونڈوراس اور میکسیکو سے بالغ افراد اور بچوں کو امریکا اسمگل کرتا تھا۔ انھیں مارچ میں انسانوں کی غیر قانونی نقل و حمل کے نتیجے میں اموات، جسمانی نقصان اور زندگیوں کو خطرے میں ڈالنے کے الزامات پر مجرم قرار دیا گیا تھا۔ جج نے اپنے فیصلے میں لکھا کہ یہ مجرم باقی زندگی جیل کی سلاخوں کے پیچھے گزاریں گے کیونکہ انہوں نے انسانی دکھوں پر منافع کمانے کا ظالمانہ راستہ چُنا۔ انھوں نے فیصلے میں مزید لکھا کہ آج کی یہ سزائیں انسانی اسمگلروں کے لیے ایک واضح پیغام ہیں کہ ہم آپ کو انصاف کے کٹہرے تک لائے بغیر نہیں رکیں گے۔ یاد رہے کہ 27 جون 2022 کو 8 بچوں اور ایک حاملہ خاتون سمیت 60 سے زائد تارکین وطنوں کو 53 فٹ لمبے ٹرک میں بھر کر امریکا میں داخل کرنے کی کوشش کی گئی تھی۔ ٹرک کا ایئر کنڈیشننگ سسٹم خراب ہوگیا تھا جس سے اندر کا درجہ حرارت سفر کے دوران خطرناک حد تک بڑھ گیا۔ جب یہ ٹرک اسی حالت میں ٹیکساس پہنچا تو 48 افراد پہلے ہی دم توڑ چکے تھے جب کہ مزید 5 نے اسپتال پہنچ کر دم توڑ دیا تھا۔ ہلاک ہونے والوں میں کئی بچے اور حاملہ خاتون بھی شامل تھیں۔ زیادہ تر کا تعلق میکسیکو، گوئٹے مالا اور ہونڈوراس سے تھا۔ امریکی حکام کے مطابق، تارکین وطن کو امریکا پہنچانے کے لیے 12 ہزار سے 15 ہزار ڈالر فی کس وصول کیے جاتے تھے۔ یہ کیس امریکا اور دنیا بھر میں انسانی اسمگلنگ کے خطرناک نتائج اور اس کی روک تھام کے لیے کیے جانے والے اقدامات کی ایک اہم مثال بن چکا ہے۔
Friday, June 27, 2025
لاہور؛ پوتوں کی لڑائی میں بیچ بچاؤ کراتے ہوئے دادا گولی لگنے سے جان کی بازی ہار گئے
لاہور کے علاقے اکبری گیٹ میں دو پوتوں کے درمیان ہونے والے جھگڑے کو ختم کرانے کی کوشش کے دوران دادا کو گولی لگ گئی۔ ایکسپریس نیوز کے مطابق پوتوں کی لڑائی چھڑوانے کے دوران فائرنگ سے ان کے دادا 85 سالہ محمد ریاض سمیت 3 افراد شدید زخمی ہوگئے۔ محمد ریاض زخموں کی تاب نہ لاتے ہوئے راستے میں ہی دم توڑ گئے جبکہ دیگر دو زخمیوں کی بھی حالت نازک ہے۔ پولیس نے لاش مردہ خانے منتقل کرتے ہوئے واقعہ کے حوالے سے تحقیقات شروع کردی ہیں۔ پولیس کا کہنا ہے کہ فائرنگ میں دادا کی ہلاکت کے بعد دونوں پوتے گل زمان اور نعمان فرار ہوگئے جو آپس میں سگے بھائی بھی ہیں۔
Thursday, June 26, 2025
کراچی میں مون سون سسٹم کی انٹری، گرج چمک کے ساتھ تیز بارش
شہر قائد کے مختلف علاقوں میں گرج چمک کے ساتھ تیز بارش ہوئی ہے جبکہ یہ سلسلہ اتوار تک وقفے وقفے سے جاری رہنے کی توقع ہے۔ ایکسپریس نیوز کے مطابق مون سون سسٹم سندھ میں برسنے کے بعد تیزی سے کراچی کی حدود میں داخل ہوگیا اور پیشگوئی کے حساب سے وقت سے پہلے بارش ہوگئی۔ موسمیاتی ماہرین کا سسٹم کی رفتار کو دیکھتے ہوئے خیال تھا کہ یہ جمعے کو کراچی کی حدود میں داخل ہوگا تاہم اگر کچھ زیادہ بھی ہوا تو رات گئے بارش شروع ہوسکتی ہے مگر توقع کے برعکس سسٹم تیزی سے کراچی کی طرف بڑھا اور برس گیا۔ بارش کا آغاز ایم نائن سے ہوا اور پھر گلشن معمار، گلشن، گلستان جوہر، شاہ فیصل، کورنگی، لانڈھی، ملیر، بن قاسم، حسن اسکوائر، غریب آباد، لیاقت آباد، فیڈرل بی ایریا، جمشید روڈ، صدر، کورنگی، اورنگی، نارتھ ناظم آباد، نئی کراچی، سرجانی، اسکیم 33 سمیت مختلف علاقوں میں بجلی کڑکنے کے بعد بادل زور دار انداز سے برسے۔ اس کے علاوہ ڈیفنس، کلفٹن، بلدیہ، شیر شاہ، کیماڑی اور دیگر علاقوں میں بھی طوفانی بارش ہوئی۔ موسمیاتی ماہرین کی پیشگوئی کے حساب سے کراچی میں بارش کا سلسلہ اتوار تک وقفے وقفے سے جاری رہے گا۔ شہریوں کیلیے ہدایت کراچی کے شہریوں کیلیے ہدایت ہے کہ وہ تیز بارش کے دوران گھروں پر رہنے کو ترجیح دیں، گڑھوں یا پانی جمع ہونے والی سڑک اور برسات کے دوران کسی نئے راستے پر جانے سے گریز کریں۔ اس کے علاوہ بارش کے دوران بجلی کے کھمبوں، برقی آلات اور سوئچ بورڈ کو چھونے سے بھی گریز کریں۔ بارش کے بعد شہر کے 300 سے زائد فیڈر بند کراچی کے مختلف علاقوں میں بارش کے بعد 300 سے زائد فیڈرز ٹرپ ہونے کے باعث کئی علاقے بجلی سے محروم ہوگئے۔ سرجانی ٹاؤن، نارتھ ناظم آباد، نارتھ کراچی، فیڈرل بی ایریا، گلشن اقبال، گلستان جوہر، پی آئی بی کالونی، لیاقت آباد سمیت متعدد علاقوں میں بجلی کی فراہمی بند ہوگئی۔ پی ڈی ایم اے اور ریسکیو 1122 کو الرٹ رہنے کی ہدایت صوبائی وزیر مخدوم احمد زمان نے بارش کے پیش نظر پی ڈی ایم اے اور ریسکیو 1122 کو الرٹ رہنے کی ہدایت کردی ہے۔
Wednesday, June 25, 2025
کراچی میں خالی فلیٹ میں زور دار دھماکا، خاتون جاں بحق
شہر قائد کے علاقے گلبہار میں واقع خالی فلیٹ میں زور دار دھماکا ہوا جس کے نتیجے میں 55 سالہ خاتون جاں بحق ہوگئیں۔ ایکسپریس نیوز کے مطابق گلبہار میں فلیٹ کے اندر زور دار دھماکے سے علاقے میں خوف و ہراس پھیل گیا ، دھماکے سے فلیٹ میں آگ بھڑک اٹھی۔ واقعے میں فلیٹ کا ملبہ گلی میں جا گرا جبکہ جھلس کر زخمی ہونے والی خاتون دوران علاج زخموں کی تاب نہ لاتے ہوئے جاں بحق ہوگئی۔ واقعے کی بعد پولیس نے کرائم سین یونٹ اور بی ڈی ایس کو بھی طلب کیا اور شواہد اکھٹے کیے۔ اس حوالے سے ایس ایچ او گلبہار ہدایت حسین نے ایکسپریس کو بتایا کہ بدھ کی صبح ساڑھے دس اور گیارہ بجے کے درمیان علاقے میں موجود عمارت کی پہلی منزل کے فلیٹ میں دھماکا ہوا جس کے نتیجے میں آگ بھڑک اٹھی جبکہ واقعے میں 52 سالہ فاطمہ جھلس کر شدید زخمی ہوگئی جسے فوری طبی امداد کے لیے سول اسپتال برنس وارڈ منتقل کر دیا گیا جہاں وہ دوران علاج زخموں کی تاب نہ لاتے ہوئے جاں بحق ہوگئی۔ دھماکے سے فلیٹ کی بالکونی اور دیگر ملبہ گلی میں گرا تاہم اس میں کوئی جانی نقصان نہیں ہوا۔ انھوں نے بتایا کہ فوری طور پر فائر بریگیڈ کو اطلاع دی گئی جس نے موقع پر پہنچ کر آگ پر قابو پالیا جبکہ واقعے کی تحقیقات کے لیے کرائم سین یونٹ اور بم ڈسپوزل یونٹ کو بھی طلب کیا گیا۔ ہدایت حسین نے بتایا کہ ابتدائی تحقیقات میں معلوم ہوا ہے کہ دھماکے میں جاں بحق ہونے والی خاتون دوسری منزل پر رہائش پذیر تھیں اور پہلی منزل کا فلیٹ بھی انہی کا ہے جو کہ کافی عرصے سے بند تھا اور شبہ ہے کہ اس میں گیس بھر جانے کی وجہ سے ماچس جلانے یا کوئی شارٹ سرکٹ ہونے کی وجہ سے دھماکا ہوا۔ بم ڈسپوزل یونٹ پولیس نے بھی واقعے کو گیس کا دھماکا قرار دیا ہے۔
گوگل پلے اور ایپ اسٹور نے دو خطرناک ایپس پر پابندی عائد کردی
اسمارٹ فون صارفین کی تصاویر چرانے کے معاملے پر دو خطرناک ایپس پر پابندی عائد کردی گئی۔ گوگل پلے اور ایپل ایپ اسٹور سے ہٹائے جانے کے بعد سائبر سیکیورٹی محققین نے خبردار کیا ہے کہ ٹک ٹاک کی چربہ ایپلی کیشنز بھی صارفین پر اس طرح کے حملے کر سکتی ہیں۔ کیسپر اسکائی کے ماہرین نے خبردار کیا ہے کہ ہمارے اسمارٹ فون کیمرا رولز عموماً سیکڑوں تصاویر اور اسکرین شاٹس رکھتے ہیں، جن میں سے کچھ ہمارے خلاف بھی استعمال کیے جا سکتے ہیں۔ ان تصاویر میں بینک اسٹیٹ منٹ، کارڈ کی تفصیلات، فوٹو آئی ڈی اور سیکیورٹی کوڈ کے اسکرین شاٹ سمیت کچھ بھی ہو سکتا ہے۔ ان ایپس کے متعلق خیال کیا جا رہا ہے کہ یہ اسپارک کیٹ میلویئر کی نئی قسم کے ساتھ جوڑی گئی ہیں۔ یہ ایک نقصان دہ سافٹ ویئر کی قسم ہے جس کو کیسپر اسکائی نے جنوری میں دریافت کیا تھا۔ یہ سافٹ ویئر جو آئی فون اور اینڈرائیڈ ڈیوائسز کو ہدف بنا رہا ہے ایک خاص آپٹیکل کریکٹر ریکاگنیشن (او سی آر) ٹول استعمال کرتا ہے جو ہیکرز کو فون کے اندر دیکھنے میں مدد دیتا ہے۔ بلیپنگ کمپیوٹر کے مطابق چرایا گیا ڈیٹا (اگر تصاویر حساس معلومات رکھتی ہیں) تو دوسرے شر انگیز مقاصد جیسے کہ بھتے وغیرہ کے لیے بھی استعمال کیا جا سکتا ہے۔ میلویئر پھیلانے کے لیے استعمال ہونے والے پلیٹ فارمز میں ایپل ایپ اسٹور پر موجود کرنسی ایپ 币کوائن اور گوگل پلے موجود انسٹنٹ میسنجر SOEX تھے۔ بلیپنگ کمپیوٹر کے مطابق SOEX (اس ایپ میں بھی کرپٹو کرنسی ایکسچینگ فیچرز ہیں) اینڈرائیڈ کے آفیشل ایپ اسٹور کے ذریعے 100 سے زیادہ بار ڈاؤن لوڈ کی گئی ہے۔
Subscribe to:
Posts (Atom)
